Samsung ရဲ့ နောက်ဆုံးထုတ် Galaxy S10 ဟာ စွမ်းရည်မြင့်မားပါတယ်။ ဒါပေမယ့် Lock Screen Security နဲ့ ပတ်သက်ပြီးတော့ အားနည်းချက် ရှိနေပါတယ်။ အဲဒါကတော့ သူ့ရဲ့ Face Unlock ကို ဓါတ်ပုံ၊ ဗီဒီယိုများနဲ့ လှည့်စားကျော်ဖြတ်နိုင်တာပါ။ အမွှာ 2 ယောက်ကိုတောင် ဖုန်းက မခွဲခြားနိုင်ဘူးလို့ လက်တွေ့စမ်းသပ်မှုများက ပြောထားပါတယ်။

The Verge နဲ့ Lewis Hilsenteger (Unbox Therapy) တို့က Galaxy S10 ရဲ့ မျက်နှာခွဲခြမ်းစိတ်ဖြာတဲ့စနစ်ကို အဲဒီလိုလှည့်စားနိုင်ခဲ့ကြတာကို ဖော်ပြထားကြပါတယ်။ အခြားဖုန်းတစ်လုံးမှာ ပိုင်ရှင်ရဲ့ဓါတ်ပုံနဲ့ ဗီဒီယိုများကို Galaxy S10 ရဲ့ Face Unlock စနစ်အား ပြသခြင်းဖြင့် လှည့်စားခဲ့ကြတာ ဖြစ်ပါတယ်။

Great Social App ရဲ့ Jane Wong က သူမမောင်ရဲ့ Galaxy S10 ကို သူမရဲ့မျက်နှာနဲ့ Unlock လုပ်ပြခဲ့ပါတယ်။ Default အားဖြင့် Galaxy S10 မှာ Face Unlock အတွက် Faster Recognition ကို On ထားပါတယ်။ လျင်မြန်စွာ Unlock လုပ်နိုင်ဖို့ပါ။ ဒါပေမယ့် မျက်နှာကို မြန်မြန်ခွဲခြမ်းစိတ်ဖြာတဲ့အတွက် ဒီလိုအားနည်းချက်ရှိသွားတာလည်း ဖြစ်နိုင်ပါတယ်။

ဒါပေမယ့်လည်း SmartWorld က Faster Recognitiion ကို Off ထားရင်တောင် ဓါတ်ပုံနဲ့ လှည့်စားနိုင်တယ်လို့ သတင်းပေးထားပါတယ်။ အဲဒီအတွက် ဖုန်းများရဲ့ ကင်မရာအခြေပြု Face Recognition များကို ရာနှုန်းပြည့် မယုံကြည်သင့်ပါဘူး။

Credit: NetGuide Journal (Every Wednesday)