Apple ရဲ့အသစ်ထွက်ရှိလာမယ့် ဗီဒီယို streaming ဝန်ဆောင်မှုကို နိုဝင်ဘာလအတွင်း မိတ်ဆက်ဖို့ စီစဉ်ထားပြီး တစ်လကို ၉.၉၉ ဒေါ်လာ ကျသင့်မယ်လို့ Bloomberg ကဖော်ပြခဲ့ပါတယ်။

Apple အနေနဲ့ ဝန်ဆောင်မှု ထွက်ရှိမယ့်ရက် ဒါမှမဟုတ် ဈေးနှုန်းကို မပြောသေးပေမယ့် ဒီနှစ် မတ်လမှာတော့ ဗီဒီယိုဝန်ဆောင်မှုတစ်ခု လာမယ်လို့ မိတ်ဆက်ထားပါတယ်။ Apple ရဲ့ထုတ်ကုန်က Disney+ ကို ပြိုင်ဆိုင်သွားမှာ ဖြစ်ပါတယ်။ Disney+ ဟာ Disney စတူဒီယိုက ပိုင်ဆိုင်တဲ့ ဝန်ဆောင်မှုဖြစ်ပြီး Disney ကပိုင်တဲ့ ရုပ်ရှင်တွေ၊ Marvel ဇာတ်ကားတွေ၊ Star Wars ဇာတ်ကားတွေနဲ့ ကုမ္ပဏီကပိုင်ဆိုင်တဲ့ ကွန်ရက်က ရုပ်ရှင်တွေအားလုံး ပါဝင်လာမှာ ဖြစ်ပါတယ်။

Apple ဟာ၂၀၂၀ ခုနှစ်အရောက် နှစ်စဉ်ဝန်ဆောင်မှုတွေကနေ ဝင်ငွေ ဒေါ်လာ ၅၀ ဘီလျံ အထိ ရောက်ရှိဖို့ မျှော်လင့်နေပြီး TV Plus ဖြန့်ချိမှုက အဲဒီ စံချိန်ကို ယူဆောင်လာနိုင်ပါတယ်။ နိုဝင်ဘာလအတွင်း Apple TV Plus ဝန်ဆောင်မှုမှာ တီဗီအစီအစဉ် ၅ ခုပဲ ပါဝင်လာဦးမယ်ဖြစ်ပါတယ်။ အဲဒါတွေကတော့ ဂျနီဖာအန်နီစတန်နဲ့ ရစစ္စဝပ်သာစပွန်းတို့ပါဝင်တဲ့ The Morning Show ၊ Aquaman ရဲ့ဂျေဆင်မိုမိုအာပါဝင်တဲ့ See နဲ့ သရုပ်ဆောင် အော့တေဗီးယားစပင်ဆာ ပါဝင်တဲ့ Truth Be Told အပြင် စတီဗင်စပီးဘာ့ချ်ရဲ့ Amazing Stories နဲ့ Home အမည်ရ မှတ်တမ်းစီးရီးတို့ပဲ ဖြစ်ပါတယ်။

Apple အနေနဲ့ Netflix လိုုမျိုး တီဗီအစီအစဉ်တွေကို အလျင်အမြန် ဖန်တီးသွားမှာ မဟုတ်ဘူးလို့ သိရပါတယ်။ Apple အနေနဲ့ အော်ပရာဝင်းဖရေးလိုမျိုး ကျော်ကြားသူကို ဆွဲဆောင်ထားကာ TV Plus အတွက် မှတ်တမ်းစီးရီး ၂ ခုဖန်တီးပေးမယ်လို့ သိရပါတယ်။ Apple အနေနဲ့ The Morning Show နဲ့ See ပေါ်မှာ ဒေါ်လာသန်းရာပေါင်းများစွာ အသုံးပြုထားပါတယ်။

Credit : www.internetjournal.media