ရှူးရှဲအရသာ ကိုရီးယားခေါက်ဆွဲစားမယ်။

မိုးအေးအေးမှာ ရှူးရှဲအရသာ ကိုရီးယားခေါက်ဆွဲ ပူပူစပ်စပ်လေးစား ကြည့်ရအောင်နော်။

အခုမိတ်ဆက်ပေးမှာက မင်္ဂလာတောင်ညွှန့်မြို့နယ်မှာ ဖွင့်လှစ်ထားတဲ့ “ Seoul Korea Noddle Spicy 7 Levels” ဆိုတဲ့ ကိုရီးယားခေါက်ဆွဲဆိုင်လေးပါ။ လစာထုတ်တဲ့ရက်တုန်းက သူငယ်ချင်းတွေနဲ့ အတူတူသွားစားဖြစ်တယ်လေ။ အရသာလည်းကောင်း၊ ဆိုင်အပြင်အဆင်ရော၊ စားစရာ၊ ခွက်၊ ပန်းကန်ကအစ အစစအရာရာ သန့်သန့်ရှင်းရှင်းလေး ဖြစ်နေတာကြောင့် Recommend ပေးချင်လာတယ်။

ခေါက်ဆွဲကို အမဲသားခေါက်ဆွဲ၊ ငါးခေါက်ဆွဲ၊ ရေဘဝဲခေါက်ဆွဲ၊ ကြက်ပေါင်းခေါက်ဆွဲ၊ ပုစွန်ခေါက်ဆွဲ၊ ဝက်နံရိုးခေါက်ဆွဲ၊ ပင်လယ်စာခေါက်ဆွဲ၊ အမယ်စုံခေါက်ဆွဲ ဆိုပြီး အရသာရှစ်မျိုးတောင် မှာစားလို့ရတယ်လေ။ အစပ်အဆင့် ၇ မျိုးခွဲထားပြီး၊ အစပ်ဆုံးက အဆင့် ၇ ဖြစ်ပြီး၊ အစပ်အနည်းဆုံးကတော့ အဆင့် ၁ ပါ။ ဒါပေမဲ့ အစပ်မစားနိုင်တဲ့ သူတွေအတွက် တစ်ထစ်ထပ်လျော့ပြီး အစပ်အရသာ 0.5 နဲ့လည်း မှာစားလို့ရတယ်။ လုံးဝ အစပ်မစားနိုင်တဲ့သူတွေကတော့ ခေါက်ဆွဲအချိုပဲ စားပေါ့။ အချိုစားရတာတော့ သိပ်ခံတွင်း မတွေ့လှပါဘူး။ ကိုယ်တွေက သူတို့ ကိုရီးယားတွေလောက် အစပ်မစားနိုင်တော့ အဆင့် ၁၊ အဆင့် ၂ လောက်ပဲ စားကြည့်ဖို့ အကြံပေးပါတယ်။

ကိုရီးယားကားတွေထဲကလို ရှူးရှူးရှဲရှဲ စားချင်တယ်ဆိုပြီး အဆင့် ၅၊ ၆၊ ၇ လောက် မှာမိရင်တော့ ကျိန်းသေတယ် ၂ ဇွန်းအပြင် ပိုစားနိုင်မှာ မဟုတ်ပါဘူးနော်။ ခေါက်ဆွဲက အစပ်အရသာကို အဓိကထား ကြော်ငြာထားပေမဲ့လည်း အစပ်အရသာပဲမဟုတ်ဘဲ ချို၊ ငံ၊ ချဉ်၊ စပ် အရသာ အားလုံး အစပ်အဟပ်တည့်ပြီး စားလို့ တကယ်ကောင်းတယ်။

အဲဒီဆိုင်လေးမှာ ခေါက်ဆွဲအပြင် ကိုရီးယား ရိုးရာအစားစားတစ်ခုဖြစ်တဲ့ Kimbap Cake (သို့မဟုတ်) ရေညှိထမင်းလိပ်၊ Tobbokki Cake (သို့မဟုတ်) တော့ပုကီ နဲ့ ဂျပန်အစားအစာဖြစ်တဲ့ Japan Takoyaki Cake (သို့မဟုတ်) ရေဘဝဲလုံးကြော်တွေလည်း မှာစားလို့ရသေးတယ်။ အအေးလည်း အစုံရတယ်။

စျေးနှုန်းလေးတွေကတော့
●ဝက်နံရိုးခေါက်ဆွဲ ၄၀၀၀
●ငါးခေါက်ဆွဲ ၄၀၀၀
●ကြက်ပေါင်းခေါက်ဆွဲ ၄၅၀၀
●အမဲသားခေါက်ဆွဲ ၄၅၀၀
●ရေဘဝဲခေါက်ဆွဲ ၄၅၀၀
●ပင်လယ်စာခေါက်ဆွဲ ၄၅၀၀
●အမယ်စုံခေါက်ဆွဲ ၅၀၀၀
●ပုစွန်ခေါက်ဆွဲ ၆၅၀၀ ကျပ် နဲ့ အသားများများနဲ့ စားချင်သူတွေက Extra အနေနဲ့ အသားထပ်မှာလို့ရတယ်။ Extra ကတော့ ၁၀၀၀ ကနေ ၄၅ဝဝကျပ် အထိစျေးအမျိုးမျိုးပေါ့။

မနက် ၉:၀၀ မှ ည ၉:၃၀ အထိ ပိတ်ရက်မရှိဖွင့်လှစ်ထားပြီး၊ ဆိုင်ရဲ့လိပ်စာတွေကတော့

ဆိုင်ခွဲ(၁) အမှတ် ၂၀/ ၂၂၊ ဂျိုးဖြူလမ်းမကြီး၊ မင်္ဂလာတောင်ညွှန့်မြို့နယ်။

ဆိုင်ခွဲ(၂) အမှတ် ၁၂၊ သံသုမာလမ်းနှင့် ကမာကြည်လမ်းထောင့်၊ ရန်ကုန်သစ်ရပ်ကွက်၊ သင်္ဃန်းကျွန်းမြို့နယ်။

ဆိုင်ခွဲ(၃) အမှတ် ဂျီ၅ ၊ ဒိုင်းမွန်းကွန်ဒို၊ ပြည်လမ်း၊ ကမာရွတ်မြို့နယ်။

တို့ပဲဖြစ်ပါတယ်။ ခေါက်ဆွဲကြိုက်သူတွေရော၊ အစပ်ချစ်သူတွေပါ အဆင်ပြေမယ့် ဆိုင်လေးမို့ တစ်ခေါက်လောက်တော့ မြည်းစမ်းကြည့်ဖို့ တိုက်တွန်းပါတယ်နော်။

By: Laimar