ရန်ကုန်တိုင်းဒေသကြီးအတွင်းက တက္ကသိုလ်ကျောင်းပေါင်း ၁၆ ကျောင်းပါဝင်တဲ့ Mobile Esports ပြိုင်ပွဲကို ပြုလုပ်သွားမှာဖြစ်တယ်လို့ သိရပါတယ်။

Game Cast Network Myanmar နဲ့ရန်ကုန်တိုင်းဒေသကြီးအတွင်းက ကျောင်းပေါင်း ၁၆ ကျောင်း ပူးပေါင်း လုပ်ဆောင်ခြင်းဖြစ်ပြီး လက်ရှိကျောင်းမှာ ပညာသင်ကြားနေတဲ့ ကျောင်းသား၊ ကျောင်းသူတွေ ပါဝင်ယှဉ်ပြိုင်နိုင်မယ်လို့ သိရပါတယ်။ ပါဝင်တဲ့မိုဘိုင်းဂိမ်း အမျိုးအစားကတော့ Mobile Legends Bang Bang နဲ့ PUBG Mobile ဂိမ်းအမျိုးအစားနှစ်မျိုး ဖြစ်ပါတယ်။

“နိုင်ငံတကာအဆင့် ပြိုင်ပွဲတွေမှာ မြန်မာနိုင်ငံက Esports အားကစားသမားတွေအနေနဲ့ ယှဉ်ပြိုင်မှု အားကောင်းတဲ့ အားကစားသမားတွေအနေနဲ့ သတ်မှတ်ခြင်းခံနေရပါတယ်၊ မြန်မာနိုင်ငံက Esports ကစားသမားတွေအနေနဲ့ ပြိုင်ပွဲတွေမှာ အရည်အချင်းအစစ်အမှန်တွေ ထွက်ပေါ်လာစေဖို့အတွက် ရည်ရွယ်ပြီးလုပ်တာပါ” လို့ Game Cast Network Myanmar မှ တာဝန်ရှိသူ ဦးစိုးမိုးအေးက ပြောကြားခဲ့ပါတယ်။

Mobile Legends ဂိမ်းမှာ အနိုင်ရရှိမယ့် အသင်းအနေနဲ့ ဆုကြေးဒေါ်လာ ၂,၅၀၀ ရရှိမှာ ဖြစ်ပြီး ဒုတိယအသင်း အတွက် ဆုကြေးဒေါ်လာ ၁,၅၀၀၊ တတိယအသင်းအတွက် ဒေါ်လာ ၈၀၀ နဲ့အတူ ပြိုင်ပွဲတစ်လျှောက် အကောင်းဆုံးကစားသမားဆုကိုလည်း ချီးမြှင့်သွားမှာဖြစ်တယ်လို့ သိရပါတယ်။

PUBG မိုဘိုင်းဂိမ်းအတွက် အနိုင်ရရှိတဲ့အသင်းအနေနဲ့ ဆုကြေးဒေါ်လာ ၂,၅၀၀ ရရှိမှာဖြစ်ပြီး ဒုတိယအသင်းအတွက် ဆုကြေးဒေါ်လာ ၁,၅၀၀ နဲ့ တတိယအသင်းအတွက် ဆုကြေးဒေါ်လာ ၈၀၀ ကို ချီးမြှင့်သွားမှာဖြစ်ပါတယ်။ ပြိုင်ပွဲတစ်လျှောက် ရန်သူကို အများဆုံးသတ်နိုင်တဲ့ ကစားသမားဆုကိုလည်း ထပ်မံချီးမြှင့်သွားမှာကြောင်း သိရပါတယ်။

-အောင်သက်ကို

Credit : www.internetjournal.media