ကချင်မြေဆိုတာနဲ့လူတိုင်းကဆီးနှင်းတွေဖုံးလွှမ်းတဲ့ရေခဲတောင်တွေကိုမြင်ယောင်ကြတယ် အဲဒါရဲ့အခြားတစ်ဖက်ကကချင်တွေရဲ့မြို့တော်မြစ်ကြီးနားကိုလည်းတောင်ပေါ်မြို့တစ်မြို့လို့ထင်မှတ်မှားကြတယ် ကိုယ်အပါအဝင်ပေါ့။သို့သော်မြစ်ကြီးနားသည်မြေပြန့်မြို့တော်တစ်ခုနဲ့ပိုတူပီး မြို့ပတ်ဝန်းကျင်မှာတောင်တွေကိုသိပ်မတွေ့ရပါဘူး။ဧရာဝတီမြစ်စတင်မွေးဖွားရာအရပ်မို့အနယ်နယ်အရပ်ရပ်ကခရီးသွားတွေကမြစ်ဆုံကိုအဓိကလာကြသလို ကချင်ရိုးရာမနောပွဲတော်ကိုလည်းလူတိုင်းလာကြည့်ချင်ကြတာအမှန်ပါပဲ။မြန်မာပြည်တောင်ဘက်စွန်းမှာနေတဲ့သူမို့ငယ်ငယ်ကတော့မြောက်ဖျားကကချင်မြေသည်ကိုယ့်အတွက်ဝေးလံလွန်းသည်ဟုထင်ခဲ့မိသည်။တကယ့်တကယ်ရောက်ခဲ့တော့မြစ်ကြီးနားသည်သွားလာရအရမ်းအဆင်ပြေပီးလမ်းအရမ်းသာသောမြို့ဖြစ်လို့နေသည်။

ဘယ်လိုသွားလဲ

ကား ရထား လေယာဉ် အဆင်ပြေရာနဲ့သွားလို့ရပါတယ်။ကိုယ်သွားခဲ့တာကတော့ကားနဲ့ပါ နာရီများစွာကားစီးတာနဲ့ကျင့်သားရနေတဲ့သူဆိုရင်တော့ကားနဲ့သွားပါ ခရီးမဖင့်သလို ရန်ကုန်-မြစ်ကြီးနားတိုက်ရိုက်ရောက်တဲ့ကားတွေရှိပါတယ် High class တို့ မိုးကောင်းကင်တို့အစီးများကြပါတယ်။အခုနောက်ပိုင်း မန္တလေး-မြစ်ကြီးနားရထားခရီးစဉ်ကအရမ်းနာမည်ကြီးလာပီး စီးရတာအရင်ကထက်သက်တောင့်သက်သာပိုဖြစ်လာတယ်လို့ပြောတယ်။အဲကြောင့်ရထားစီးပီးထပ်သွားကြည့်ချင်နေတယ်။အချိန်လည်းသိပ်မရှိ မြစ်ကြီးနားလည်းသွားလည်ချင်တဲ့သူတွေကတော့လေယာဉ်ပဲစီးစေချင်ပါတယ်။

ဘာတွေလည်စရာရှိလဲ

ကချင်မြေဆိုတာကတော့လည်လို့မကုန်တဲ့နေရာကြီးပါ။တစ်ခုပဲ မြစ်ကြီးနားကနေသွားရတဲ့လည်စရာနေရာတွေကနဲနဲတော့ဝေးပါတယ်။အဲကြောင့်မြစ်ကြီးနားကိုsolo travelling လုပ်ဖို့သိပ်အားမပေးပါဘူး။မြစ်ကြီးနားကအဓိကလည်စရာနေရာတွေကိုတော့ သီချင်းတွေစာတွေထဲရင်းနှီးပီးသားဖြစ်မှာပါ။ထပ်လည်လို့ရတဲ့နေရာလေးတွေကော အဓိကလည်လို့ရတဲ့နေရာလေးတွေကောပြောပြချင်ပါတယ်။

မြစ်ဆုံ

မြစ်ကြီးနားသွားတဲ့သူတိုင်းမရောက်မဖြစ်နေရာပါ။ခုနောက်ပိုင်းမြစ်ဆုံရောက်ရင်ကချင်မျိုးနွယ်စုဝတ်စုံလေးတွေနဲ့ဓာတ်ပုံရိုက်တာအရမ်းခေတ်စားပါတယ်။ရိုးရာဝတ်စုံလေးတွေနဲ့မြစ်ဆုံရဲ့ကျောက်ခဲလှလှလေးတွေပေါ်မှာဓာတ်ပုံရိုက်ခဲ့ပါ။မြစ်ကြီးနားမြို့ထဲကနေဆိုရင်တစ်နာရီကျော်လောက်သွားရပါတယ်။မြစ်ဆုံကစားသောက်ဆိုင်မှာကချင်အစားအသောက်တွေမှာစားလို့ရပါတယ်။ငါးကင်ကတော့နာမည်ကြီးပဲ။

အောင်မြေသာစံပြကျေးရွာ

မြစ်ဆုံသွားတဲ့လမ်းနဲ့တစ်ကြောထဲပါပဲ။ကျောက်တုံးတွေနဲ့စမ်းချောင်းလှလှလေးပေါ်မှာဝါးတဲလေးတွေဆောက်ထားတာ။အဓိကကတော့ရှုခင်းကြည့်ရင်းစားသောက်ဖို့အတွက်လုပ်ထားတဲ့နေရာလေးပါပဲ။ရေလည်းဆော့လို့ရတယ် ဝါးတောလေးနဲ့ကြိုးတံတားနဲ့အရမ်းကိုသာယာတာပဲ။

မနောကွင်း

မနောတိုင်တွေက ကချင်လူမျိုးတွေရဲ့အမှတ်အသားတစ်ခုဆိုတော့ သွားလေ့လာသင့်ပါတယ်။ကွင်းထဲမှာတော့ပွဲတော်ရာသီမဟုတ်ရင်ဘာမှတော့မရှိပေမယ့် မနောတိုင်တွေနဲ့ကချင်ပြည်နယ်ရောက်အမှတ်တရဓာတ်ပုံကတော့မရိုက်မဖြစ်ပေါ့။

ကရိန်နော်အပန်းဖြေဥယျာဉ်

မြစ်ကြီးနားကလူတွေအပန်းဖြေဖို့အဓိကလာကြတဲ့နေရာပါ။ဧရာဝတီမြစ်ကမ်းဘေးမှာဆောက်ထားတဲ့မြစ်ကြီးနားကအထင်ကရအပန်းဖြေစခန်းမို့သွားကြည့်သင့်ပါတယ်။

ဟိန္ဒူရွှေဘုရားကျောင်းကြီး

မြစ်ကြီးနားဈေးကြီးနား ဧရာဝတီမြစ်ကမ်းဘေးကပန်းခြံ နံဘေးမှာရှိတဲ့ဘုရားကျောင်းပါ။ညဘက်ဖြတ်သွားတော့မီးတွေနဲ့အရမ်းခမ်းနားလို့မနက်ဘက်ပြန်သွားပီးဓာတ်ပုံရိုက်ခဲ့တာ။

G.E.I.S memorial church

ကျောက်တုံးတွေနဲ့ဆောက်ထားတဲ့ဘုရားကျောင်းပါ။မြစ်ကြီးနားမှာကျောက်တုံးတွေနဲ့ဆောက်ထားတဲ့အခြားဘုရားကျောင်းတွေရှိပေမယ့်သူကတော့အထင်ကရပါ။သက်တမ်းရင့်ဘုရားကျောင်းတစ်ခုဖြစ်တယ်။

ဂျော်ဘွန်ဆုတောင်းတောင်

ခရစ်ယာန်ဘာသာဝင်တို့ရဲ့ဘာသာရေးဆိုင်ရာဆုတောင်းတောင်ပါ။အဲမှာမျှော်စင်ရှိတယ် မျှော်စင်ပေါ်ကနေမြစ်ကြီးနားတခွင်ရှုခင်းကြည့်လို့ရတယ်။

ဆဒုံးရေတံခွန်

မြစ်ကြီးနားကနေမိုင်၄၀အကျော်မှာရှိတာပါ။ခြောက်ထပ်ရေတံခွန် အဆင့်ဆင့်နဲ့အရမ်းလှတယ်ပြောတယ် မရောက်ခဲ့ဘူး။အပြန်လမ်းမှာဝါရှောင်ဆည်လည်းဝင်ခဲ့လို့ရတယ်။

ကချင်မြေမှစားစရာများ

မြစ်ကြီးနားကပြန်လာပီးကတည်းကရန်ကုန်မှာခေါပုတ်တို့ဟူးနွေးလိုက်ရှာဝယ်စားတာကိုယ်ပါ။ခေါက်ဆွဲနဲ့ပတ်သက်ရင်ရှမ်းပြည်ပဲမျက်စိထဲပြေးမြင်တာ မြစ်ကြီးနားရောက်မှ များလိုက်တဲ့ခေါက်ဆွဲစားနည်းမျိုးစုံဆိုတာ လိုက်မမှီဘူး။တို့ဟူးကိုလည်းအမျိုးစုံကြိုးခုန်လုပ်စားကြသေးတာ။မြစ်ကြီးနားမှာဟိုနေရာဒီနေရာလျှောက်မသွားပဲအစားချည်းတကားသွားရိုက်ရင်ကိုတန်တယ်။ညဈေးကကြက်ဥကဇော်ဆိုတာကတော့နာမည်ကြားလိုက်တာနဲ့မစားချင်ဘူး ဘယ်လိုကြီးလဲလို့။မြည်းကြည့်လိုက်မှကောင်းလိုက်တာဆိုတာလေ တကယ့်ကိုမြစ်ကြီးနားမှာမစားမဖြစ်စားခဲ့ရမယ့်ဟာပဲ။ထမင်းတွေဟင်းတွေဆိုလည်းသစ်ရွက်ကလေးတွေနဲ့ထုပ်ထားတာ။ကြက်ကချင်ချက် ငါးကချင်ချက်တို့ဆိုလည်းဖက်ရွက်ကလေးနဲ့ထုပ်ထားတဲ့အထုပ်လေးတွေစားရတာ။နောက်နာမည်ကြီးတာကစကောထမင်းပါ။

လက်ဆောင်ပစ္စည်းဝယ်စရာလေးတွေ

မြစ်ကြီးနားမှာဆားမုန့်ကတော့နာမည်ကြီးတယ်။နောက် ပယင်းပုတီးလေးတွေ လက်ကောက်လေးတွေလည်းဝယ်လို့ရတယ်။ကချင်အထည်တွေကတော့မဝယ်မဖြစ်ပေါ့။

ခုနောက်ပိုင်းဇလုံတောင်-အင်းတော်ကြီးအိုင်-မြစ်ကြီးနား အဲလမ်းကြောင်းကအရမ်းကိုသွားလာကြတော့ မြစ်ကြီးနားရောက်ရင်သွားလည်နိုင်အောင်ရေးပေးလိုက်ပါတယ်

Credit : https://www.facebook.com/zanflyingsolo