ကော်ရည်ခေါက်ဆွဲလို့ကြားလိုက်တာနဲ့ ပျစ်ချွဲနေတဲ့ ကော်ရည်ကို အရင်ပြေးမြင်ကြတယ်။ လူတိုင်းလိုလို ကြိုက်တဲ့ အစားအစာထဲမှာတော့ ပါဝင်ခြင်းမရှိပါဘူး။ ဒီလိုအမြင်တွေကို NooDi က ပြောင်းလဲ နိုင်စွမ်းရှိတယ်။ ကော်ရည်ဆို ခါးခါးသီးသီး မကြိုက်တဲ့သူတွေက လွဲရင် NooDi က ကော်ရည်ခေါက်ဆွဲကို တစ်ခေါက်လောက်တော့ သွားစားကြည့်စေချင်တယ်။
ပြည်တွင်းကြိုက်အရသာကို အခြေခံထားပြီး သူတို့ကိုယ်ပိုင် နည်းပညာနဲ့ ချက်ပြုတ်ထားတယ်လို့သိရတယ်။ အရသာကောင်းအောင် အချိုမှုန့်မသုံးဘဲ အသားပေါင်းအရည်ကို အချိုတည်ပြီး ချက်ထားတယ်လို့ ကြားရတယ်။ ဒါကြောင့် အရသာဟာ ချိုချိုလေးဖြစ်နေသည်တိုင်အောင် ရေငတ်တာမျိုးမဖြစ်ဘူး။
ကျွန်တော်တို့ စားလာတတာ အမယ် (၅)မျိုး။ ကြက်ပေါင်းကော်ရည်ခေါက်ဆွဲ၊ ဝက်ခြေထောက်စွပ်ပြုတ်၊ ဝက်ပသျူးသုတ်၊ သင်္ဘောသီးထောင်း၊ ဖက်ထုတ်ပီဇာ တို့ပါပဲ။

ကြက်ပေါင်းကော်ရည်ခေါက်ဆွဲ (၁,၃၀ဝ + ၁,၅၀ဝ ကျပ်)

NooDi ရဲ့ အသက်က ကော်ရည်ခေါက်ဆွဲပဲ။ တစ်ခြားဆိုင်တွေမှာ မရနိုင်တဲ့ Menu ရွေးချယ်မှုမျိုး သူ့မှာ ရနိုင်တယ်။
အရည်မှာမယ်ဆိုရင် ကြက်ပေါင်းရည်၊ အသုပ်၊ ကော်ရည် ဆိုပြီး အရည် (၃) မျိုးရွေးလို့ရတယ်။ သူက ၁၃၀ဝကျပ်။
ပြီးတော့ အဖတ်မှာဆိုရင် ဂျုံပြားခေါက်ဆွဲ၊ ဂျုံခေါက်ဆွဲလုံး၊ ညှပ်ခေါက်ဆွဲပြား၊ ကြာဇံ ဆိုပြီး ထပ် ရွေးလို့ရတယ်။ ဒါတွေက Free။ ဒါပေမယ့် ဖက်ထုပ်ထည့်မယ်ဆိုရင်တော့ ၇၀ဝကျပ် ထပ်ပေးရမယ်။
ပြီးတော့ Topping ထည့်မယ်။ သူတို့ Topping မှာ အီကြာကွေး၊ နံရိုးပေါင်း၊ ကြက်ပေါင်း၊ အသားလုံးပေါင်း၊ အသားလုံးကြော်၊ ဝက်ခေါက်ပေါင်း၊ ဝက်အူပေါင်း၊ ဆားငန်ဘဲဥ၊ ဖက်ထုပ် အစရှိတာတွေကို ထပ်ဖြည့်လို့ရတယ်။ အနည်းဆုံး ၃၀ဝကျပ် ကနေ စပြီး ၁၅၀ဝ ကျပ် အထိရှိတယ်။
ကျွန်တော်တို့က ကော်ရည် + ဂျုံခေါက်ဆွဲလုံး + ကြက်ပေါင်း ဆိုပြီး မှာလိုက်တယ်။
ကော်ရည်ဆိုပြီး အရမ်းပျစ်အီနေတာမျိုးမဟုတ်ဘူး။ အချိုအပူ အရသာ အရမ်းတည့်တယ်လို့ ပြောရမယ်။ သူ့ရဲ့ ငါးပိထောင်းကလည်း အသက်ပဲ။ မြန်မာတွေအကြိုက် လေးလေးပင်ပင်နဲ့ ချိုတဲ့ အရသာကို အပြည့်အဝရတယ်လို့ ဆိုရမယ်။

ရှုးရှဲသင်္ဘောသီးထောင်းသုပ် (၁၅၀ဝ ကျပ်)

သူကတော့ ကော်ရည်နဲ့ တွဲစားရတယ်လို့ပြောတယ်။
ကျွန်တော်တို့ကတော့ အတွဲအစပ်ကိုမသိဘဲ သင်္ဘောသီးထောင်းကို နောက်ဆုံးမှ စားလိုက်တော့ ရှုးရှဲနေအောင် စပ်တော့တာပဲ။

ဖက်ထုပ်ပီဇာ (၂၀ဝ၀ ကျပ်)

အကြိုက်ဆုံးတွေထဲက တစ်ခုလို့ပြောလို့ရတယ်။ ဖက်ထုပ်ဆိုင်တော်တော်များများက အသားနည်းနည်းနဲ့ အရွက်များများထည့်တတ်ကြတယ်။ အဲ့ဒီလိုဆိုင်တွေနဲ့ ကြုံရတိုင်း ဂျင်းထည့်ခံရသလို ခံစားရတယ်။
NooDi ကတော့ ကျွန်တော်တို့ လိုချင်တဲ့ ခံစားချက်မျိုးကို အပြည့်အဝပေးနိုင်ခဲ့တယ်။ ဖက်ထုပ် ၁၀ ခုပါတယ်။ အရွက်နည်းနည်းနဲ့ အသားများများ…။ ကျွန်တော်တို့ အားလုံးက ပေးရတာထက် ပိုတန်တဲ့အရာမျိုးကိုလိုအပ်ကြတယ်။ ဒါကို ဒီ ဖက်ထုပ်ပီဇာက ဖြည့်စည်းပေးနိုင်တယ်။

ဝက်ခြေထောက်စွပ်ပြုတ် (၂,၅၀ဝ ကျပ်) ၊ ဝက်ပသျူးသုတ် (၂,ဝ၀ဝ ကျပ်)

ကျွန်တော်တို့ သွားစားတဲ့အချိန်တုန်းက ဒီ Menu နှစ်ခုဟာ စမ်းသပ်နေတုန်းအဆင့်မှာပဲရှိနေသေးတယ်။
ပုံမှန် အရသာပုံစံမျိုးပါပဲ၊ တစ်ခုသဘောကျတာက ချိုပေမယ့် အချိုမှုန့် အရသာမရတာပဲ။ ဒီတစ်ခုတော့ တော်တော် အားရတယ် လို့ပြောရမယ်။

လက်ရှိမှာတော့ ကြည့်မြင်တိုင်နဲ့ တာမွေမှာ ၂ဆိုင်ဖွင့်ထားတယ်လို့သိရတယ်။ သင်တို့ကို လည်း တစ်ခေါက်လောက်တော့ မြည်းစမ်းကြည့်စေချင်ပါတယ်။ တကယ်ကို ပေးရတာထက် တန်တဲ့ ခံစားချက်မျိုးဖြစ်စေမှာပါ။

By : Theingi Kyaw